15|4|2013
رقم 44
الميعاد 10.5 صباحا
بنادى هيئة قضايا الدولة _ الزمالك
مش عارفة ليه المقابلة دى عملت ليا اشراقة فى قلبى
وختمت بخير حلو اوووى الساعة 10 مساء
مكنتش متخيلة ان اليوم هيكون روووعة كده
بعكس تماااما يوم مقابلة النيابة الادارية اللى حسيت فيها اننا طلبة وقدام مكتب شئون الطلاب
ف اليوم ده حسيت اننا اعضاء ف السلك القضائى مش مجرد طلبة جايين يعملوا مقابلة
كل الشباب والبنات ماشاء الله كانوا بدل وحاجة فخيمة كده
ف اليوم ده رحت المقابلة مع خالو بس
مكنتش عاملة حسابى خالص ان خالو هييجى معايا
كل شوية يبصلى وانا بذاكر يقولى حفظتى ياماما ويضحك بيتريق عليا ديما شايف نظام مذاكرتى غلط وانى بحفظ
وان هو من اوائل حقوق القاهرة لكن مذاكرته كانت قراءة وفهم بس
اللى اسعدنى اكتر ف اليوم ده هو انه حلو تلاقى حد مهتم بيك بيلف حواليك
خالو كان معايا وعمال يدينى ف تعليمات
ويقولى خليكى واثقة كده وجدعة واوعى مش تجاوبى ف يغمى عليكى وطبعاا دى الوصية اللى بيوصيها ليه فى كل مقابلة وانا ااكدله انه طبعااااا هكون عادية جداااا وان ده نصيب بحت
بس من جوايا خوف رهيــب كل ما يمر الوقت كل ما اتعلق اكتر ب الحياة دى
خالو وافق يسبنى اروح ف ميكروباص الفيوم مع صحابى وبدأ النادى يخف من زحمة الطلبة شوية شوية وبدأت اتحرك بحرية واتصور بقى
وماشاء الله صحابى مبيسكتوش اللى تقولى يييييييه البدلة مرفعاكى اوووووى انتى سالته كده ليه
واللى تقولى انتى هتدخلى للمستشارين من هنا وهما يقولولك اطلعى ياشاطرة انتى لسه صغيرة ع المقابلات
ارفونى صراحة بنات عثــــــل يعنى
وطلعت من النادى مع اذان العصر وقعدت الف فى شوارع الزمالك
مش عارفة ليه كل اللى قابلتهم اجانب هى الزمالك دى مش تبع مصر بردوا
وانا خارجة من باب النادى قولت الحمدلله تعالــــــى
الحمدلله ان ربنا رزقنى متعة يوم ذى ده حتى ولو مليش نصيب انى اكون من اعضاءه
متشكرة ياخالو جدااااااا جدااااا ويارب يراضيك ويرضى عنك وتشوف الخير فى اولادك
وقد مر يومـــــى كريمــــا
*ملحوظة صغيرة *
ف يوم من الايام من كام سنة مش عارفة عددها كتبت هنا انى جدااااا مضايقة من كليتى
وانا بكتب كنت بقول ف نفسى الف مرة ياترى هقدر اجيب تقدير * جيدجدا*
كانت اقصى طموحاتى التقدير كنت حساه هيفتح كل الابواب وقد كان وجبته
ولما مريت ع كتابتى السابقة حسيت انى حققت حاجة كان نفسى فيها فابتسمت وقولت الحمدلله تعالى
يـــــــــارب بعد فترة اعدى ع كتابى ده واكون حققت حاجة فى النفس وابتسم واقول الحمدلله وامضــــــى فى حلم جديد
